40 cubich de lën: chësta ie la cuantità de lën che n adrova de media per frabiché na cësa de lën. Chisc 40 cubich crësc do ti bosc de Südtirol te 10 menuc y tol su feter 40 tones de CO2. La nstalazion de lën da udëi sun la pitla plaza Sant Antone dal 15 de setëmber incà ie granda avisa chisc 40 cubich. L fin de chësta nstalazion ie de mustré su i vantajes dl frabiché cun lën.
Chi che frabica cun lën da ncuntribut atif ala prutezion dl tlima, davia che uni cubich de lën tol su feter 1 tona de CO2 y fej nsci da tanch de CO2. Oradechël ie lën n material de costruzion renuvabl che cuntribuesc a stravardé la ressorses limitedes. L lën possen nce rezitlé, do si zitlus de vita possel unì adurvà coche forma de energia renuvabla. La nstalazion de lën dla IDM y ProRamus ie granda 4,4 m x 5,4 m x 2,9 m y uel mustré su duta la carateristiches positives dl lën y sensibilisé la minonga publica sun l frabiché cun lën. L ie n cubo de lën cun na piedia vërda y tofles cun nfurmazions te duta la trëi rujenedes.
“Te Südtirol ons me n 10% de cëses de lën, tl Tirol ne iel bele 30%” dij Erwin Hinteregger, CEO dl’IDM. “Deberieda a nosc Partner de ProRamus, uel l’IDM de n cuntribut per aumenté chësta perzentuela tres nfurmazions sun la tematica.”
Scota su la ntervista sun Radio Gherdëina dl 11.09.2025 cun chësta tematica:https://www.radiogardena.it/ld/trasmiscion?id=7579
