Tla garage Pana iel a despusizion doi auti a lectrisc che n possa se mpresté ora. Co feji pa sce uei adurvé n auto car sharing?
- Cëria ju l’aplicazion “AlpsGo” sul fonin.
- Cëla l video de spiegazion de 5 menuc: https://www.youtube.com/watch?v=0TA2ecZ49Bo. L video spiega avisa ciche ie da fé sce n uel adurvé n auto de car sharing.
Bon a savëi:
- N paia cun na cherta de credit.
- L auto vën giaurì y śarà cun l fonin. Cëla che te es assé patrì sun l fonin. Sce te es de bujën de l ciarië, tol pea n cabl da ciarië (USB-C) y cëriel te auto.
- L ie da liejer y ti jì do avisa ala ndicazions che vën dates sun l’aplicazion.
Tan costa pa a furné cun n auto car sharing?
- Per chi che à la “Val Gardena Club Card”(*):
L mpresté ora n auto costa 6,00 € al ëura (cun n mascim de 49,00€ al di) y 0,28 € al chilometer ulache ie laite nce l strom che l auto a lectrisc adrova a furné.
- Per chi che ne à nia la “Val Gardena Club Card”:
L ie da crì ora danter la tarifa flex y activ:
- Cun la tarifa flex costa l mpresté ora n auto 8,00 € al ëura (cun n mascim de 59,00€ al di) y 0,28 € al chilometer ulache ie laite nce l strom che l auto a lectrisc adrova a furné. N muessa mpresté ora l auto almanco trëi ëura.
- Cun la tarifa activ paiun 5,90 € al mëns. L mpresté ora n auto costa perchël mé 6,00 € al ëura (cun n mascim de 49,00€ al di) y 0,28 € al chilometer ulache ie laite nce l strom che l auto a lectrisc adrova a furné. N muessa mpresté ora l auto almanco n ëura.
Per plu nfurmazions: https://www.alpsgo.it/de/faq
(*) Chi che à la “Val Gardena Club Card“ messëssa avëi giapà na e-mail cun n nvit a fé pert dl team “Val Gardena Club Card”. Drucan sun l link vëniun metui ite tl team “Val Gardena Club Card” ciche cumporta a n miëur priesc per l servisc de car sharing. Chi che à la cherta ma ne à nia giapà la e-mail possa cuntaté la Lia per l turism de Urtijëi.
